കൊവിഡ് കേസുകൾ വർധിക്കുന്ന സാഹചര്യത്തിൽ എല്ലാ ജില്ലകള്ക്കും പ്രതിരോധം ശക്തമാക്കാന് നിര്ദേശം നല്കിയതായി ആരോഗ്യമന്ത്രി വീണ ജോർജ്. കൊവിഡ് കേസുകള് 1000ന് മുകളില് റിപ്പോര്ട്ട് ചെയ്ത എറണാകുളം, തിരുവനന്തപുരം ജില്ലകള്ക്ക് പ്രത്യേക ജാഗ്രത നിർദേശം
നല്കിയിട്ടുണ്ടെന്നും മന്ത്രി വ്യക്തമാക്കി.
ആശുപത്രികളിലും ഐസിയുവിലും ചികിത്സ തേടുന്നവരുടെ എണ്ണം കുറവാണ്. 27,991 ആക്ടീവ് കേസുകളുണ്ടായിരുന്നതില് 1285 പേര് ആശുപത്രികളിലും 239 പേര് ഐസിയുവിലും 42 വെന്റിലേറ്ററുകളിലും ചികിത്സയിലുള്ളത്. പ്രായമായവരിലും അനുബന്ധ രോഗമുള്ളവരിലും വാക്സിന് എടുക്കാത്തവരിലുമാണ് കൂടുതലും രോഗം ഗുരുതരമാകുന്നത്. അതിനാല് തന്നെ അവര് കൂടുതല് ശ്രദ്ധിക്കണമെന്നും മന്ത്രി പറഞ്ഞു.
ആരില് നിന്നും ആരിലേക്കും കൊവിഡ് ബാധിക്കാന് സാധ്യതയുണ്ട്. അതിനാല് വ്യക്തിപരമായ ശ്രദ്ധ ഏറെ പ്രധാനമാണ്. കൊവിഡിനെ പ്രതിരോധിക്കാന് എല്ലാവരും നിര്ബന്ധമായി മാസ്ക് ധരിക്കണം. ഇടയ്ക്കിടയ്ക്ക് സോപ്പും വെള്ളവും ഉപയോഗിച്ചോ സാനിറ്റൈസര് ഉപയോഗിച്ചോ കൈ വൃത്തിയാക്കണം. കൈ വൃത്തിയാക്കാതെ കണ്ണ്, മൂക്ക്, വായ് എന്നിവ സ്പര്ശിക്കരുത്. ആദ്യ ഡോസും രണ്ടാം ഡോസും കരുതല് ഡോസും എടുക്കാനുള്ള എല്ലാവരും വാക്സിന് എടുക്കേണ്ടതാണ്. സംസ്ഥാനത്ത് കൊവിഡ് വര്ധിക്കാതിരിക്കാന് എല്ലാവരുടേയും സഹകരണവും ശ്രദ്ധയും ഉണ്ടാകണമെന്ന് ആരോഗ്യ മന്ത്രി വീണാ ജോര്ജ്. ആരോഗ്യ വകുപ്പ് കൊവിഡ് സാഹചര്യം വിലയിരുത്തുന്നുണ്ട്.
സ്കൂള് തുറന്ന സാഹചര്യത്തില് കുട്ടികളെയും ശ്രദ്ധിക്കേണ്ടതാണ്. കൃത്യമായി മാസ്ക് ധരിപ്പിച്ച് മാത്രം സ്കൂളില് വിടുക. 12 വയസിന് മുകളിലുള്ള എല്ലാ കുട്ടികള്ക്കും കൊവിഡ് വാക്സിന് നല്കുക. കുട്ടികളില് നിന്നും പ്രായമുള്ളവരിലേക്കും മറ്റസുഖമുള്ളവരിലേക്കും കൊവിഡ് ബാധിക്കാന് സാധ്യതയുള്ളതിനാല് പ്രത്യേകം ശ്രദ്ധ വേണമെന്നും ആരോഗ്യമന്ത്രി വ്യക്തമാക്കി.
