ന്യൂഡല്‍ഹി: കൊറോണ വൈറസിനെതിരെ ഇന്ത്യ നടത്തുന്ന പോരാട്ടത്തെ പ്രശംസിച്ച് അന്താരാഷ്ട്ര നാണയ നിധി(ഐഎംഎഫ്). സാമ്പത്തിക ഉന്നമനത്തിനാവശ്യമായ നടപടികള്‍ സ്വീകരിക്കുന്നതിലും മറ്റ് രാജ്യങ്ങള്‍ക്ക് വാക്സിന്‍ നല്‍കി സഹായിക്കുന്നതിലും ഇന്ത്യ സ്വീകരിച്ച നിലപാടുകളെയാണ് ഐഎംഎഫ് മേധാവിയായ ഗീത ഗോപിനാഥ് അഭിനന്ദിച്ചത്.
മറ്റ് രാജ്യങ്ങളെ പോലെ കൊറോണ വൈറസ് ഇന്ത്യന്‍ സാമ്പത്തിക രംഗത്തെയും പിടിച്ചുലച്ചിരുന്നു. സാധാരണയായി ഇന്ത്യയ്ക്ക് 6% വളര്‍ച്ച രേഖപ്പെടുത്താറുണ്ടെങ്കിലും 2020ല്‍ ഇത് നെഗറ്റീവ് 8 ശതമാനമായി കുറഞ്ഞിരുന്നു. എന്നാല്‍, ഇന്ത്യയുടെ സാമ്പത്തിക രംഗം ഇപ്പോള്‍ തിരിച്ചുവരവിന്റെ പാതയിലാണ്. 2021ല്‍ വളര്‍ച്ചാ നിരക്ക് 11.5 ശതമാനമായി ഉയരുമെന്നും വളര്‍ച്ചാ നിരക്ക് രണ്ടക്കം കടക്കുന്ന ഒരേ ഒരു രാജ്യമായി ഇന്ത്യ മാറുമെന്നും ഗീത ചൂണ്ടിക്കാട്ടി.
ഇന്ത്യയുടെ വളര്‍ച്ചയെന്നാല്‍ അത് മറ്റ് രാജ്യങ്ങള്‍ക്കു കൂടി ഗുണകരമാകുമെന്നും ഇതിലൂടെ അന്താരാഷ്ട്ര തലത്തില്‍ സാമ്പത്തിക രംഗം വീണ്ടും സജീവമാകുമെന്നും ഗീത അഭിപ്രായപ്പെട്ടു. നിലവിലെ സാഹചര്യത്തില്‍ കൊറോണ സൃഷ്ടിച്ച വെല്ലുവിളിയെ നേരിടുന്നതിന് ഇന്ത്യയുടെ സേവനം നിര്‍ണായകമാണെന്നും ഗീത ഗോപിനാഥ് വ്യക്തമാക്കി.
കൂടാതെ ഇന്ത്യയുടെ വാക്സിന്‍ പോളിസിയെയും ഗീത പ്രശംസിച്ചു. ലോകത്തെ ഒരേയൊരു വാക്സിന്‍ ഹബ് എന്ന ബഹുമതി ഇന്ത്യയ്ക്കു സ്വന്തമാണെന്നും ഗീത വ്യക്തമാക്കി. 56 ലക്ഷം ഡോസ് വാക്സിനുകളാണ് ഇന്ത്യ മറ്റ് രാജ്യങ്ങള്‍ക്ക് നല്‍കി സഹായിച്ചിരിക്കുന്നത്. ശ്രീലങ്ക, ഭൂട്ടാന്‍, മാലദ്വീപ്, നേപ്പാള്‍, ബംഗ്ലാദേശ്, മ്യാന്‍മര്‍, സീഷെല്‍സ് തുടങ്ങിയ രാജ്യങ്ങള്‍ക്കെല്ലാം ഇന്ത്യ വാക്സിന്‍ നല്‍കിയിട്ടുണ്ട്. ഇത്തരത്തില്‍ വന്‍ തോതില്‍ വാക്സിന്‍ ഉത്പ്പാദനം നടത്തുന്ന സെറം ഇന്‍സ്റ്റിറ്റ്യൂട്ട് ഓഫ് ഇന്ത്യയ്ക്കും ഗീത അഭിനന്ദനം അറിയിച്ചു.
