അന്തരീക്ഷ താപനിലയിലുണ്ടായ കനത്ത വർദ്ധനവ് കന്നുകാലികൾക്കും സൂര്യതാപം എൽക്കാനുള്ള സാധ്യത കൂട്ടുന്നതിനാൽ പകൽ 10 മണിക്കും അഞ്ചു മണിക്കും ഇടയിൽ കന്നുകാലികളെ തുറസ്സായ സ്ഥലങ്ങളിൽ കെട്ടിയിടരുത് എന്ന നിർദ്ദേശവുമായി മൃഗസംരക്ഷണ വകുപ്പ്. സൂര്യാഘാതത്തിന്റെ ലക്ഷണങ്ങളായ തളർച്ച ,ഭക്ഷണം വേണ്ടായ്ക, പനി, വായിൽ നിന്നും നുരയും പതയും വരൽ, വായ തുറന്ന ശ്വസനം , പൊള്ളിയ പാടുകൾ എന്നിവ ശ്രദ്ധയിൽ പെട്ടാൽ ഉടൻ തന്നെ വെള്ളം നനച്ച് നന്നായി തുടയ്ക്കുകയും,. കുടിക്കാൻ ധാരാളം വെള്ളം നൽകുകയും വിദഗ്ദ്ധ ചികിത്സ തേടുകയും വേണമെന്ന് മ്യഗസംരക്ഷണ വകുപ്പ് പുറപ്പെടുവിച്ച ജാഗ്രതാ നിർദ്ദേശങ്ങളിൽ പറയുന്നു.
കന്നുകാലികളേയും വളർത്തുമൃഗങ്ങളേയും അത്യുഷ്ണത്തിൽ നിന്ന് രക്ഷിക്കുന്നതിന് താഴെ പറയുന്ന നിർദേശങ്ങൾ പാലിക്കുന്നതിന് ശ്രദ്ധിക്കേണ്ടതാണ്.തണുത്ത ശുദ്ധജലം എല്ലാ വളർത്തുമൃഗങ്ങൾക്കും എല്ലായ്പ്പോഴും ലഭ്യമാക്കണം.
വായൂ സഞ്ചാരമുള്ള തൊഴുത്തും ഫാനും എപ്പോഴും നിർബന്ധമാക്കുക
മേൽക്കൂരയ്ക്ക് മുകളിൽ പച്ചക്കറി പന്തൽ,തുള്ളി നന സ്പ്രിങ്ക്ളർ, നനച്ച ചാക്കിടുന്നത് ഉത്തമം. രാവിലെ 9 മണി മുതൽ വൈകിട്ട് 5 മണി വരെ പൊള്ളുന്ന വെയിലിൽ തുറസ്സായ സ്ഥലത്ത് കെട്ടിയിടുന്നത് ഒഴിവാക്കുക
വളർത്തുമൃഗങ്ങളുടെ യാത്രകൾ രാവിലെയും വൈകിട്ടുമായി പരിമിതപ്പെടുത്തണം
ശുദ്ധമായ തണുത്ത കുടിവെള്ളം എപ്പോഴും ലഭ്യമായിരിക്കണം കറവപശുക്കൾക്ക് 80- 100 ലിറ്റർ വെള്ളം ദിവസവും കൊടുക്കുക.
ധാരാളം പച്ചപ്പുല്ല് /ഈർക്കിൽ മാറ്റിയ പച്ച ഓല /പനയോല ലഭ്യമാക്കണം മികച്ച ഖരാഹാരം അഥവാ കാലിത്തീറ്റ രാവിലെയും വൈകിട്ടുമായും വൈക്കോൽ രാത്രിയിലുമായി പരിമിതപ്പെടുത്തുക
കനത്ത ചൂടിൽ കൂടുതൽ ഉമിനീർ നഷ്ടപ്പെടുന്നതു മൂലം ദഹനക്കേടും വയറിളക്കവും ഉണ്ടാകാം. ധാതുലവണ മിശ്രിതം, അപ്പക്കാരം, വിറ്റാമിൻ എ ,ഉപ്പ് ,പ്രോബയോട്ടിക്സ് എന്നിവ ഒരു ഡോക്ടറുടെ നിർദ്ദേശപ്രകാരം കറവപ്പശുക്കളുടെ തീറ്റയിൽ ഉൾപ്പെടുത്തേണ്ടതാണ്
വേനൽ ചൂട് ശരീര സമ്മർദ്ദം കൂട്ടുകയും പ്രതിരോധശേഷി കുറയ്ക്കുകയും ചെയ്യുന്നതിനാൽ ബാഹ്യ പരാദങ്ങളെ നിയന്ത്രിക്കുന്നതിനുളള മുൻകരുതൽ സ്വീകരിക്കണം. മൃഗങ്ങളുടെ അകിടിൽ നിന്നും പാൽ പൂർണ്ണമായും കറക്കണം. രാവിലേയും വൈകീട്ടുമാകണം കറവ.
നായ്ക്കൾ, പൂച്ചകൾ, കിളികൾ എന്നിവയെ കാറിൽ അടച്ചിട്ട് കൊണ്ട് ഉടമസ്ഥർ പോകുന്നത് സൂര്യാഘാതത്തിനിടയാക്കും. അരുമകൾക്കും ശുദ്ധമായ തണുത്ത കുടിവെള്ളവും പ്രോബയോട്ടിക്സും നൽകേണ്ടതാണ് . സൂര്യാഘാതം മരണകാരണമായേക്കാം.
