സാമ്പത്തിക തട്ടിപ്പ് കേസില്‍ മഹാത്മ ഗാന്ധിയുടെ പേരക്കുട്ടിക്ക് തടവുശിക്ഷ. ഗാന്ധിജിയുടെ ചെറുമകളും പ്രമുഖ മനുഷ്യാവകാശ പ്രവര്‍ത്തകയുമായ എല ഗാന്ധിയുടെ മകള്‍ ആശിഷ് ലത രാംഗോബി (56) നാണ് ഡര്‍ബന്‍ കോടതി ഏഴ് വര്‍ഷം തടവുശിക്ഷ വിധിച്ചത്. ആറ് മില്യണ്‍ റാന്‍ഡിന്റെ (ഏകദേശം മൂന്നേകാല്‍ കോടി രൂപ) തട്ടിപ്പ് നടത്തിയെന്നാരോപിച്ചാണ് ശിക്ഷ. തട്ടിപ്പിന് പുറമെ വ്യാജരേഖ ചമയ്ക്കല്‍ അടക്കം ഇവര്‍ക്കെതിരെ ചുമത്തിയ കുറ്റങ്ങള്‍ തെളിഞ്ഞ സാഹചര്യത്തിലാണ് കോടതി ശിക്ഷ പ്രഖ്യാപിച്ചത്.
ഇന്ത്യയില്‍ നിന്നുള്ള ‘ഇല്ലാത്ത’ ചരക്കിന് ഇറക്കുമതി-കസ്റ്റംസ് തീരുവകള്‍ ക്ലിയര്‍ ചെയ്യുന്നതിനായി വ്യവസായി ആയ എസ്.ആര്‍. മഹാരാജ് എന്നയാളില്‍ നിന്നും പണം വെട്ടിച്ചു എന്നാണ് പരാതി. ഇയാള്‍ക്ക് ലാഭത്തിന്റെ ഒരു വിഹിതം നല്‍കാമെന്നും ഇവര്‍ വാഗ്ദാനം നല്‍കിയിരുന്നു. 2015ലാണ് കേസില്‍ ലതയ്‌ക്കെതിരെ വിചാരണ തുടങ്ങുന്നത്. ആ സമയത്ത് ഇന്ത്യയില്‍ നിന്നും മൂന്ന് കണ്ടെയ്‌നര്‍ ലിനന്‍ കയറ്റി അയക്കുന്നുണ്ടെന്ന് നിക്ഷേപകരെ ബോധ്യപ്പെടുത്തുന്നതിനായി ഇവര്‍ വ്യാജരേഖകളും ഇന്‍വോയ്‌സുകളും നല്‍കിയെന്നാണ് നാഷണല്‍ പ്രോസിക്യൂട്ടിംഗ് അഥോറിറ്റിയുടെ ബ്രിഗേഡിയര്‍ ഹംഗ്വാനി മുലോഡ്‌സി പറഞ്ഞത്.
ആ സമയത്ത് ഇവര്‍ക്ക് ജാമ്യം അനുവദിക്കുകയും ചെയ്തിരുന്നു. 2015 ലാണ് ലത ന്യൂ ആഫ്രിക്ക അലയന്‍സ് ഫൂട്ട് വെയര്‍ ഡിസിട്രിബ്യൂട്ടേഴ്‌സ് ഡയറക്ടര്‍ ആയിരുന്ന, മഹാരാജിനെ സമീപിക്കുന്നത്. തുണിത്തരങ്ങളും ചെരിപ്പുകളും ഇറക്കുമതി ചെയ്ത് നിര്‍മ്മാണവും വില്‍പ്പനയും നടത്തിയിരുന്ന മഹാരാജയുടെ കമ്പനി, ലാഭവ്യവസ്ഥയില്‍ ഫിനാന്‍സും ലഭ്യമാക്കിയിരുന്നു. സൗത്ത് ആഫ്രിക്കന്‍ ഹോസ്റ്റിറ്റല്‍ ഗ്രൂപ്പ് നെറ്റ്‌കെയറിനായി മൂന്ന് കണ്ടെയ്‌നര്‍ ലിനന്‍ ഇറക്കുമതി ചെയ്തുവെന്ന് പറഞ്ഞാണ് ലത ഇയാളെ സമീപിക്കുന്നത്.
ഇറക്കുമതി-കസ്റ്റംസ് തീരുവകള്‍ക്ക് സാമ്പത്തിക പ്രതിസന്ധി നേരിട്ടുവെന്നും ഹാര്‍ബറില്‍ ചരക്ക് ക്ലിയര്‍ ചെയ്യുന്നതിന് പണം വേണമെന്നുമായിരുന്നു ഇവര്‍ ആവശ്യപ്പെട്ടതെന്നാണ് എന്‍പിഎ വക്താവിനെ ഉദ്ധരിച്ച് റിപ്പോര്‍ട്ട്. ഇതിനായി 6.2 മില്ല്യണ്‍ റാന്‍ഡ് ആണ് ആവശ്യപ്പെട്ടത്. തെളിവിനായി ചരക്കുകള്‍ വാങ്ങിയ ഓര്‍ഡറും ഇവര്‍ കാണിച്ചിരുന്നു. ഇതിന് പുറമെ നെറ്റ്‌കെയര്‍ എന്ന സ്ഥാപനത്തിന്റെ പേരിലുള്ള ഇന്‍വോയ്‌സും നല്‍കിയിരുന്നു.
ലതയുടെ കുടുംബത്തിലുള്ള വിശ്വാസ്യതയും നല്‍കിയ രേഖകളും കണക്കിലെടുത്ത് മഹാരാജ് ഇവര്‍ ആവശ്യപ്പെട്ട തുക നല്‍കി സഹായിക്കുകയായിരുന്നു. എന്നാല്‍ അധികം വൈകാതെ ഈ രേഖകള്‍ വ്യാജമാണെന്നും നെറ്റ്‌കെയറിന് ലതയുമായി ഒരു ഇടപാടും ഇല്ലെന്നും വ്യക്തമാവുകയായിരുന്നു. ഇതോടെയാണ് ഇയാള്‍ പരാതി നല്‍കിയത്.
