സംസ്ഥാനത്തെ എല്ലാ മേഖലയിലും പിൻവാതിൽ നിയമനം നടക്കുന്നുണ്ട്. ഇപ്പോഴിതാ മെഡിക്കൽ സര്‍വ്വീസസ് കോര്‍പറേഷനിലാണ് പിൻവാതിൽ നിയമനം നടന്നിരിക്കുന്നത്. ഒരു വിജ്ഞാപനവും പ്രസിദ്ധീകരിക്കാതെ കേരള മെഡിക്കൽ സര്‍വ്വീസസ് കോര്‍പറേഷനിൽ 186 പേരെ നിയമിച്ചിട്ടുണ്ടെന്ന് ആരോഗ്യമന്ത്രി വീണ ജോര്‍ജ്ജ് സമ്മതിച്ചു കഴിഞ്ഞു. അതിൽ 135 പേര്‍ ഇപ്പോഴും വിവിധ തസ്തികകളിൽ തുടരുന്നുണ്ടെന്നാണ് ആരോഗ്യ വകുപ്പ് രേഖ. പിഎസ്‍സി പരിധിയിലല്ലാത്ത നിയമനങ്ങൾ നിര്‍ബന്ധമായും എംപ്ലോയ്മെന്റ് എക്സ്ചേഞ്ച് വഴിയായിരിക്കണമെന്ന സര്‍ക്കാർ നിബന്ധന കാറ്റിൽ പറത്തിയാണ് നിയമനങ്ങളത്രയും നടന്നിട്ടുള്ളത്.
കേരള മെഡിക്കൽ സര്‍വ്വീസസ് കോര്‍പറേഷനിലെ കരാര്‍ ദിവസ വേതന ജീവനക്കാരുടെ സേവന വിവരങ്ങളിൽ നടത്തിയ പരിശോധനയിലാണ് ഞെട്ടിപ്പിക്കുന്ന വിവരങ്ങൾ. ആരോഗ്യ മന്ത്രി പുറത്ത് വിട്ട രേഖയനുസരിച്ച് പിൻവാതിൽ നിയമനം നേടിയത് 186 പേരാണ്. ഇതിൽ 135 പേര്‍ ഇപ്പോഴും ജോലിയിൽ തുടരുന്നുണ്ട്. പിഎസ്‍സി പരിധിയിൽ വരാത്ത നിയനനങ്ങളാണെങ്കിൽ എംപ്ലോയ്മെന്റ് എക്സ്ചേഞ്ച് വഴി ഉദ്യോഗാര്‍ത്ഥികളെ കണ്ടെത്തണം. എന്നിട്ടും യോഗ്യതയുള്ളവരെ കണ്ടെത്താനായില്ലെങ്കിൽ മാധ്യമങ്ങളിൽ പരസ്യം നൽകണം.
ഇത്രയും നടപടികൾ ഒറ്റയടിക്ക് മറികടന്നാണ് ഇത്രയധികം ആളുകൾ മെഡിക്കൽ സര്‍വ്വീസസ് കോര്‍പറേഷനിൽ കയറിപ്പറ്റിയത്. സ്ഥിരപ്പെടുത്തൽ റദ്ദാക്കണമെന്ന് വിജിലൻസ് ഡയറക്ടര്‍ ശുപാര്‍ശ ചെയ്ത് ജീവനക്കാര്‍ക്ക് പോലും ശമ്പള പരിഷ്കരണം അനുവദിച്ചെന്നും സര്‍വ്വീസ് ബുക്ക് ക്രമപ്പെടുത്തി നൽകിയെന്നും കണ്ടെത്തലുണ്ട്. കരാർ ജീവനക്കാരുടെ നിയമനത്തിന് തൊഴിൽ വകുപ്പ് മാനദണ്ഡങ്ങൾ മെഡിക്കൽ സര്‍വ്വീസസ് കോര്‍പറേഷൻ പാലിച്ച് തുടങ്ങിയത് പോലും 2023 ഏപ്രിൽ മുതലാണ്. കരാര്‍ നിയമനങ്ങളിലെ പ്രാഥമിക പരിശോധനയിൽ മാത്രം ഇത്രയധികം ക്രമക്കേട് കണ്ടെത്തിയതും.
അതേസമയം സംസ്ഥാനത്തു തൊഴിൽ വകുപ്പിന്റെ കീഴിലുള്ള സ്ഥാപനങ്ങളിലടക്കം പാർട്ടി താൽപര്യം അനുസരിച്ചുള്ള പിൻവാതിൽ നിയമനങ്ങൾ വ്യാപകമായി നടക്കുമ്പോൾ നോക്കുകുത്തിയാക്കുന്നത് ലക്ഷക്കണക്കിന് തൊഴിലന്വേഷകർ പ്രതീക്ഷയോടെ നോക്കുന്ന എംപ്ലോയ്മെന്റ് എക്സ്ചേഞ്ചുകളാണ്.
കഴിഞ്ഞ എൽഡിഎഫ് സർക്കാർ അധികാരത്തിലെത്തിയ 2016 മുതൽ കഴിഞ്ഞ ഏപ്രിൽ വരെയുള്ള 7 വർഷത്തിനിടെ താൽക്കാലിക, കരാർ തസ്തികകളിൽ ലക്ഷക്കണക്കിന് നിയമനങ്ങൾ വിവിധ വകുപ്പുകളിലായി നടന്നെങ്കിലും എംപ്ലോയ്മെന്റ് എക്സ്ചേഞ്ചുകൾ വഴി നടന്നത് 80,227 എണ്ണം മാത്രമാണ്. 10–ാം ക്ലാസ് യോഗ്യത മുതൽ മെഡിസിൻ ഉൾപ്പെടെയുള്ള പ്രഫഷനൽ ബിരുദം വരെ നേടിയ 28.7ലക്ഷം പേരാണ് എംപ്ലോയ്മെന്റ് എക്സ്ചേഞ്ചുകളിൽ റജിസ്റ്റർ ചെയ്തു ജോലിക്കായി കാത്തിരിക്കുന്നത്.
