മലപ്പുറം ജില്ലയിലെ പൊന്നാനി മാതൃശിശു ആശുപത്രിയില് ഗര്ഭിണിക്ക് ഗ്രൂപ്പ് മാറി രക്തം നല്കിയ സംഭവത്തില് മലപ്പുറം സ്വദേശിനി റുക്സാനയുടെ ആരോഗ്യനില മെച്ചപ്പെട്ടു. തൃശൂര് മെഡിക്കല് കോളജില് ചികിത്സയിലാണ് ഇപ്പോൾ യുവതി.
ഗര്ഭസ്ഥ ശിശുവിന് മറ്റ് പ്രശ്നങ്ങളൊന്നുമില്ലെന്നുമാണ് മെഡിക്കല് കോളെജ് അറിയിക്കുന്നത്. പൊന്നാനി മാതൃ ശിശു ആശുപത്രിയില് വ്യാഴാഴ്ചയാണ് സംഭവം നടക്കുന്നത്. ഒ നെഗറ്റീവ് രക്തം നല്കേണ്ടതിന് പകരം ബി പോസിറ്റീവ് രക്തമാണ് നല്കിയത്.
യുവതിക്ക് രക്തക്കുറവുള്ളതിനാല് രക്തം കയറ്റാന് ഡോക്ടര് നിര്ദ്ദേശിച്ചിരുന്നു. ചൊവ്വാഴ്ചയും ബുധനാഴ്ചയും രക്തം കയറ്റി. വ്യാഴാഴ്ച എത്തിയപ്പോഴാണ് രക്തം നല്കിയത് മാറിപ്പോയത്. പകുതി രക്തം കയറ്റിയപ്പോഴേക്കും യുവതിക്ക് വിറയല് അനുഭവപ്പെട്ടു. ഡോക്ടര് എത്തി നടത്തിയ പരിശോധനയിലാണ് രക്തം മാറി നല്കിയതായി അറിയുന്നത്. തുടര്ന്നാണ് ഇവരെ തൃശൂര് മെഡിക്കല് കോളെജിലേക്ക് മാറ്റുന്നത്. രക്തം മാറി നല്കിയ നഴ്സിനെതിരെ യുവതിയുടെ കുടുംബം നടപടി ആവശ്യപ്പെട്ടിട്ടുണ്ട്.
