കോതമംഗലം: കൂത്തുപറമ്പ് സമരപോരാളി പുഷ്പനെ വാട്സാപ് ഗ്രൂപ്പിൽ അധിക്ഷേപിച്ച കോതമംഗലം എസ് ഐ കെ.പി ഹരിപ്രസാദിനെതിരെ ഡിവൈഎഫ്ഐ കോതമംഗലം ബ്ലോക്ക് കമ്മിറ്റി പ്രതിഷേധ സമരം സംഘടിപ്പിച്ചു. പ്രതിഷേധ യോഗം ഡിവൈഎഫ്ഐ എറണാകുളം ജില്ല പ്രസിഡൻ്റ് അനീഷ് എം മാത്യു ഉദ്ഘാടനം ചെയ്ത് സംസാരിച്ചു. പൊലീസുകാരുടെ വാട്സാപ് ഗ്രൂപ്പിലാണ് പുഷ്പൻ്റെ മരണത്തെ അപമാനിച്ച് അശ്ലീല ഭാഷയോട് കൂടി എസ് ഐ പ്രതികരിച്ചത്.
കോതമംഗലം പോലീസ് സ്റ്റേഷനിലെ ഗ്രേഡ് എസ്ഐയാണ് ഹരിപ്രസാദ്. ഡിവൈഎഫ്ഐ നൽകിയ പരാതിയെ തുടർന്ന് പ്രഥമ ദൃഷ്ട്യാ കടുത്ത അച്ചടക്കലംഘനം നടത്തിയെന്ന കണ്ടെത്തലിനെ തുടർന്ന് ഹരിപ്രസാദിനെ എറണാകുളം റേഞ്ച് ഡിഐജി സസ്പെൻഡ് ചെയ്തിരുന്നു. ഡിവൈഎഫ്ഐ ജില്ല സെക്രട്ടേറിയറ്റ് അംഗം ഷിജോ എബ്രാഹം , കോതമഗലം ബ്ലോക്ക് സെക്രട്ടറി ജിയോ പയസ്, പ്രസിഡൻ്റ് കെ.എൻ ശ്രീജിത്ത്, ബ്ലോക്ക് സെക്രട്ടേറിയറ്റ് അംഗങ്ങളായ എൽദോസ് പോൾ, ഷാഹിൻ ടി എ, എൽസൺ വി സജി, അരുൺ ബോബൻ, അരുൺ കുമാർ എം ആർ തുടങ്ങിയർ സംസാരിച്ചു.
