വാട്‌സ്ആപ്പ് ഓരോ അപ്‌ഡേറ്റിലൂടെയും മികച്ച ഫീച്ചറുകള്‍ അവതരിപ്പിക്കുന്നുണ്ട്. പ്ലാറ്റ്ഫോമിന്റെ സുരക്ഷയും ഉപയോക്താക്കളുടെ സൌകര്യവും വര്‍ധിപ്പിക്കുന്ന വിധത്തിലുള്ള ഫീച്ചറുകളാണ് ഇവയെല്ലാം. മെറ്റയുടെ ഉടമസ്ഥതയിലുള്ള ആപ്പ് അടുത്തിടെയാണ് വാട്‌സ്ആപ്പ് തട്ടിപ്പുകള്‍ തടയാനായി സേവ് ചെയ്യാത്ത നമ്പരുകളില്‍ നിന്നുമുള്ള കോളുകള്‍ വരുമ്പോള്‍ അവ സൈലന്റ് ആക്കുന്ന സംവിധാനമാണ് വാട്‌സ്ആപ്പ് അവതരിപ്പിച്ചത്. ഇപ്പോഴിതാ മെസേജ് പിന്‍ ചെയ്യുന്നത് സംബന്ധിച്ച പുതിയൊരു ഫീച്ചര്‍ കൂടി അവതരിപ്പിക്കാന്‍ തയ്യാറെടുക്കുകയാണ് വാട്‌സ്ആപ്പ്.
വാട്‌സ്ആപ്പുമായി ബന്ധപ്പെട്ട റിപ്പോര്‍ട്ടുകള്‍ പുറത്ത് വിടുന്ന വാബെറ്റഇന്‍ഫോയുടെ റിപ്പോര്‍ട്ടുകള്‍ പ്രകാരം, വാട്‌സ്ആപ്പ് ‘മെസേജ് പിന്‍ ഡ്യൂറേഷന്‍’ എന്ന ഫീച്ചര്‍ പുറത്തിറക്കാനുള്ള ശ്രമങ്ങളിലാണ്. വരാനിരിക്കുന്ന ഈ ഫീച്ചര്‍ ചാറ്റുകളിലും ഗ്രൂപ്പുകളിലും മെസേജുകള്‍ പിന്‍ ചെയ്യുന്ന കാലയളവ് തിരഞ്ഞെടുക്കാന്‍ ഉപയോക്താക്കളെ സഹായിക്കും. വൈകാതെ തന്നെ ഈ ഫീച്ചര്‍ എല്ലാവര്‍ക്കുമായി ലഭ്യമാകുമെന്ന് പ്രതീക്ഷിക്കുന്നു. വാട്‌സ്ആപ്പ് ബീറ്റ അപ്ഡേറ്റില് ഈ ഫീച്ചര്‍ ലഭ്യമായിട്ടുണ്ട്.
നിലവില്‍ വികസിപ്പിച്ചുകൊണ്ടിരിക്കുന്ന വാട്‌സ്ആപ്പ് മെസേജ് പിന്‍ ഡ്യൂറേഷന്‍ ഫീച്ചര്‍ ആന്‍ഡ്രോയിഡ് 2.23.13.11 അപ്ഡേറ്റിനായുള്ള ബീറ്റ വേര്‍ഷനില്‍ കണ്ടെത്തിയതായി വാബെറ്റഇന്‍ഫോ റിപ്പോര്‍ട്ട് ചെയ്തു. വൈകാതെ തന്നെ ഈ അപ്‌ഡേറ്റ് എല്ലാവര്‍ക്കുമായി ലഭ്യമാകും. വാട്‌സ്ആപ്പ് മെസേജ് പിന്‍ ഡ്യൂറേഷന്‍ ഫീച്ചര്‍ ഒരു ചാറ്റില്‍ ഒരു മെസേജ് പിന്‍ ചെയ്യുന്നതിനുള്ള കാലയളവ് സെറ്റ് ചെയ്യാന്‍ സഹായിക്കുന്നു. ഉപയോക്താക്കള്‍ക്ക് പിന്‍ ചെയ്യുന്ന മെസേജിന്റെ ഡ്യൂറേഷന്‍ സെറ്റ് ചെയ്യാനുള്ള സൌകര്യമാണ് ഇതിലൂടെ ലഭിക്കുന്നത്.
നമ്മള്‍ ഒരു മെസേജ് പിന്‍ ചെയ്യുമ്പോള്‍ എത്ര സമയത്തേക്കാണ് അവിടെ വേണ്ടത് എന്ന് തിരഞ്ഞെടുത്ത് കഴിഞ്ഞാല്‍ നിശ്ചിത സമയത്തിന് ശേഷം വാട്‌സ്ആപ്പ് ചാറ്റിലെ പിന്‍ ചെയ്ത മെസേജ് ഓട്ടോമാറ്റിക്കായി അണ്‍പിന്‍ ചെയ്യപ്പെടും. വാട്‌സ്ആപ്പ് ചാറ്റുകള്‍ക്കുള്ളില്‍ പിന്‍ ചെയ്ത മെസേജുകള്‍ നിയന്ത്രിക്കുന്നതിന് ഉപയോക്താക്കള്‍ക്ക് കൂടുതല്‍ കണ്‍ട്രോളുകള്‍ നല്‍കുക എന്ന ലക്ഷ്യത്തില്‍ വരുന്ന ഫീച്ചറാണ് ഇത്. ഈ ഫീച്ചര്‍ എങ്ങനെ പ്രവര്‍ത്തിക്കും എന്നതിനെക്കുറിച്ചുള്ള വിവരങ്ങളും പുറത്ത് വന്ന റിപ്പോര്‍ട്ടില്‍ ഉണ്ട്.
വാട്‌സ്ആപ്പിലെ മെസേജ് പിന്‍ ഡ്യൂറേഷന്‍ ഫീച്ചര്‍ ആദ്യ ഘട്ടത്തില്‍ നമുക്ക് പിന്‍ ചെയ്ത മെസേജുകളുടെ ഡ്യൂറേഷന്‍ തിരഞ്ഞെടുക്കാനായി മൂന്ന് ഓപ്ഷനുകള്‍ നല്‍കുമെന്നാണ് റിപ്പോര്‍ട്ടില്‍ പറയുന്നത്. നമുക്ക് 24 മണിക്കൂര്‍, 7 ദിവസം, 30 ദിവസം എന്നിങ്ങനെയുള്ള കാലയളവിലേക്ക് മെസേജ് പിന്‍ ചെയ്യാന്‍ സാധിക്കും. ഈ ഡ്യൂറേഷനില്‍ ഒന്ന് തിരഞ്ഞെടുത്ത് മെസേജ് പിന്‍ ചെയ്ത് കഴിഞ്ഞാല്‍ പോലും ആവശ്യമെങ്കില്‍ നിങ്ങള്‍ക്ക് ഈ സമയം അവസാനിക്കുന്നതിന് മുമ്പ് തന്നെ നിലവിലെ പിന്‍ ചെയ്ത മെസേജ് അണ്‍പിന്‍ ചെയ്യാനും സാധിക്കും.
മുകളില്‍ സൂചിപ്പിച്ചതുപോലെ വാട്‌സ്ആപ്പിലെ മെസേജ് പിന്‍ ഡ്യൂറേഷന്‍ ഫീച്ചര്‍ നിലവില്‍ വികസിപ്പിച്ചുകൊണ്ടിരിക്കുകയാണ്. ഇത് എപ്പോഴായിരിക്കും പുറത്തിറക്കുക എന്ന കാര്യം വാട്‌സ്ആപ്പ് വെളിപ്പെടുത്തിയിട്ടില്ല. ആപ്പിന്റെ ഭാവി അപ്ഡേറ്റില് ഇത് ബീറ്റ ടെസ്റ്റര്‍മാര്‍ക്ക് ലഭ്യമാക്കുമെന്ന് പ്രതീക്ഷിക്കുന്നു. പ്ലാറ്റ്ഫോമില്‍ വര്‍ധിച്ച് വരുന്ന തട്ടിപ്പുകള്‍ തടയാന്‍ വാട്‌സ്ആപ്പ് അടുത്തിടെ രണ്ട് പുതിയ സവിശേഷതകള്‍ അവതരിപ്പിച്ചിരുന്നു. ‘സൈലന്‍സ് അണ്‍ നോണ്‍ കോളേഴ്സ്’ ഫീച്ചര്‍ എല്ലാവര്‍ക്കും ലഭ്യമാക്കിയിട്ടുണ്ട്.
ഉപയോക്താക്കള്‍ക്ക് ഇന്‍കമിങ് കോളുകളില്‍ കൂടുതല്‍ നിയന്ത്രണം നല്‍കാനും പ്രൈവസി സംരക്ഷിക്കാനുമാണ് ‘സൈലന്‍സ് അണ്‍ നോണ്‍ കോളേഴ്സ്’ ഫീച്ചര്‍ വികസിപ്പിച്ചതെന്ന് ഔദ്യോഗിക ബ്ലോഗ് പോസ്റ്റിലൂടെ വാട്‌സ്ആപ്പ് വ്യക്തമാക്കി. ഈ ഫീച്ചര്‍ സ്പാം, സ്‌കാമുകള്‍, അപരിചിതരായ വ്യക്തികളില്‍ നിന്നുള്ള കോളുകള്‍ എന്നിവ ഫില്‍ട്ടര്‍ ചെയ്യുന്നു. ഇത് കൂടാതെ പ്ലാറ്റ്ഫോമിലെ പ്രൈവസി ഓപ്ഷനുകള്‍ പരിശോധിക്കാനായി ‘പ്രൈവസി ചെക്കപ്പ്’ എന്ന ഫീച്ചറും വാട്‌സ്ആപ്പ് അവതരിപ്പിച്ചിട്ടുണ്ട്.
