ബോളിവുഡ് സൂപ്പര്‍താരം അമിതാഭ് ബച്ചനെ ആശുപത്രിയില്‍ പ്രവേശിപ്പിച്ചു. മുംബൈയിലെ സ്വകാര്യആശുപത്രിയിൽ അടിയന്തര ശസ്ത്രക്രിയക്ക് വിധേയനായി. കാലിലെ രക്തകുഴലുകളിലെ തടസ്സം നീക്കുന്നതിനുള്ള ആഞ്ജിയോപ്ലാസ്റ്റി ശസ്ത്രക്രിയയാണ് നടന്നത്. ബച്ചന്‍റെ ആരോഗ്യനില തൃപ്തികരമാണെന്ന് ആശുപത്രി അധികൃതര്‍ അറിയിച്ചു. ഇന്ന് രാവിലെയാണ് താരത്തെ മുംബൈയിലെ ആശുപത്രിയിൽ പ്രവേശിപ്പിച്ചത്.
12 മണിയോടെയാണ് അമിതാഭ് ബച്ചന്‍ സോഷ്യല്‍ മീഡിയയില്‍ ഒരു കുറിപ്പ് പങ്കുവെക്കുന്നത്. എന്നെന്നും നന്ദിയോടെ എന്നാണ് അദ്ദേഹം കുറിച്ചത്. താരത്തിന്റെ ആരോഗ്യത്തേക്കുറിച്ചുള്ള വാര്‍ത്തകള്‍ പുറത്തുവന്നതോടെ ആരാധകര്‍ ആശംസകളുമായി എത്തി. 81കാരനായ അമിതാഭ് ബച്ചന്‍ കുറച്ചുനാളായി ആരോഗ്യപ്രശ്‌നങ്ങള്‍ നേരിടുന്നുണ്ട്. ഈ വര്‍ഷം ആദ്യം ഇടുപ്പിന് സര്‍ജറിക്ക് വിധേയനായിരുന്നു. പ്രഭാസ് നായകനായി എത്തുന്ന കല്‍ക്കിയുടെ ഷൂട്ടിങ്ങിനിടെ ഹൈദരാബാദില്‍ വച്ചാണ് പരിക്കേറ്റത്. മേയ് 9ന് ഇറങ്ങാൻ പോകുന്ന ചിത്രത്തിൽ വൻ താരനിരകൾ ഒരുങ്ങുന്നു.
