അന്തരിച്ച വിഖ്യാത വിവര്ത്തകനും സാഹിത്യകാരനുമായ പ്രൊഫ. പി. മാധവന്പിള്ളയ്ക്കുള്ള ഭാരത് ഭവന് വിവര്ത്തന സമഗ്ര സംഭാവനാ പുരസ്കാരം കവി പ്രഭാവര്മ്മയും ഡോ. ജോര്ജ്ജ് ഓണക്കൂറും ഭാരത് ഭവന് ഭാരവാഹികളും ചേര്ന്ന് ചങ്ങനാശ്ശേരി പെരുന്നയിലെ വസതിയില് എത്തി നല്കി. പ്രൊഫ. പി. മാധവന്പിള്ളയുടെ സഹധര്മ്മിണി യമുനയും മകള് വിദ്യയും ചേര്ന്ന് പുരസ്കാരവും, പ്രശസ്തി പത്രവും, അവാര്ഡ് തുകയായ മുപ്പതിനായിരത്തി ഒന്ന് രൂപയുടെ ചെക്കും ഏറ്റുവാങ്ങി.
പ്രൊഫ. പി. മാധവന്പിള്ളയുടെ സഹപ്രവര്ത്തകരും മാധ്യമ, സാഹിത്യരംഗത്തുള്ളവരും ബന്ധുക്കളും ഒത്തുചേര്ന്ന ചടങ്ങില് ഭാരത് ഭവന് മെമ്പര് സെക്രട്ടറി പ്രമോദ് പയ്യന്നൂര്, കേന്ദ്ര സാഹിത്യ അക്കാദമി പുരസ്കാര ജേതാക്കളായ പ്രഭാവര്മ്മ, ഡോ. ജോര്ജ്ജ് ഓണക്കൂര് എന്നിവര് പ്രൊഫ. പി. മാധവന്പിള്ളയുടെ സര്ഗ്ഗ സംഭാവനകളെ അനുസ്മരിച്ച് സംസാരിച്ചു. പ്രൊഫ. പി. മാധവന്പിള്ളയുടെ മകള് വിദ്യ മറുപടി ഭാഷണവും, ഭാരത് ഭവന് നിര്വ്വാഹക സമിതി അംഗം റോബിന് സേവ്യര് നന്ദിയും പ്രകാശിപ്പിച്ചു.
