കോണ്‍ഗ്രസ് നേതാവ് ഉമ്മന്‍ ചാണ്ടിയുടെ നിര്യാണത്തോടെ ഉപതെരഞ്ഞെടുപ്പിനൊരുങ്ങുന്ന പുതുപ്പള്ളി മണ്ഡലവുമായി ബന്ധപ്പെട്ട് രാഷ്ട്രീയ അഭ്യൂഹങ്ങള്‍ ശക്തിപ്പെടുന്നു.
പുതുപ്പള്ളിയില്‍ ബിജെപിയുടെ പ്രകടനം ഒരു പ്രതീക്ഷയ്ക്കും വകയില്ലാത്തതാണ്. എങ്കിലും ക്രൈസ്തവ സഭാ സമൂഹത്തിന്റെ നിലപാട് അറിയാനുള്ള പരീക്ഷണ വേദിയാണ് ബിജെപിക്ക് പുതുപ്പള്ളി.എ.കെ. ആന്റണിയുടെ മകന്‍ അനില്‍ ആന്റണിയെ ബി.ജെ.പി ഇവിടെ രംഗത്തിറക്കുന്നു എന്ന വാര്‍ത്തയാണ് ഇപ്പോള്‍ പ്രചരിക്കുന്നത്.
ഉമ്മന്‍ ചാണ്ടിയുടെ മകന്‍ ചാണ്ടി ഉമ്മന്‍ യു.ഡി.എഫ് സ്ഥാനാര്‍ഥിയാകുമെന്ന പ്രചാരണത്തിനിടെയാണ് മുതിര്‍ന്ന മറ്റൊരു കോണ്‍ഗ്രസ് നേതാവ് എ.കെ. ആന്റണിയുടെ മകന്‍ അനില്‍ ആന്റണിയെ ബി.ജെ.പി ഇവിടെ രംഗത്തിറക്കും എന്ന വാര്‍ത്ത വരുന്നത്.
അതിന് ബലം പകരുന്ന വിധം ചില സി.പി.എം നേതാക്കളുടെ സമൂഹമാധ്യമ പോസ്റ്റുകളും പ്രത്യക്ഷപ്പെട്ടു. കഴിഞ്ഞ തെരഞ്ഞെടുപ്പില്‍ ബി.ജെ.പി ഈ മണ്ഡലത്തില്‍ 11,000ത്തിലധികം വോട്ട് നേടിയിരുന്നു. അനില്‍ വന്നാല്‍ അതില്‍ കൂടുതല്‍ വോട്ട് എന്നതാണ് ബി.ജെ.പി ലക്ഷ്യം.ഒരു കാലത്ത് എ കെ ആന്റണിയുടെ വലംകൈയായിരുന്നു ഉമ്മന്‍ ചാണ്ടി. ഈ സാഹചര്യത്തില്‍ ചാണ്ടി ഉമ്മനെതിരെ അനില്‍ ആന്റണി എത്തുമോ എന്നാണ് എല്ലാവരും ഉറ്റുനോക്കുന്നത്.അനില്‍ ആന്റണി പുതുപ്പള്ളിയില്‍ മത്സരിക്കുകയാണെങ്കില്‍ എ കെ ആന്റണി കോണ്‍ഗ്രസ് സ്ഥാനാര്‍ത്ഥിയുടെ പ്രചരണത്തിന് വരുമോ എന്ന ചോദ്യവും ഉയരുന്നുണ്ട്.
ലോക്‌സഭാ തെരഞ്ഞെടുപ്പില്‍ കോട്ടയത്ത് അനില്‍ ആന്റണിയെ തന്നെ മത്സരിപ്പിക്കാനും പാര്‍ട്ടിക്ക് പദ്ധതിയുണ്ട്. ഇതൊക്കെ മുന്നില്‍ കണ്ടാണ് അനില്‍ ആന്റണിയെ ബിജെപി ദേശീയ സെക്രട്ടറിയായി നേതൃത്വം നിയമിച്ചതും.
അതേസമയം കേരളത്തിലെ നേതാക്കള്‍ ഇതിനെ രഹസ്യമായി എതിര്‍ക്കുകയാണ്. മണ്ഡലത്തില്‍ ഒരു വോട്ടു പോലും സ്വാധീനിക്കാന്‍ അനിലിനാകില്ല എന്ന് നേതാക്കള്‍ സമ്മതിക്കുന്നുണ്ട്.
മക്കള്‍ രാഷ്ട്രീയത്തെ തള്ളിപ്പറഞ്ഞ കോണ്‍ഗ്രസ് നേതാക്കളുടെ മക്കള്‍ മണ്ഡലത്തില്‍ പരസ്പരം ഏറ്റുമുട്ടുമോ എന്ന ചോദ്യമാണ് സി.പി.എമ്മിലെ ചില ഉന്നതര്‍ ഉന്നയിക്കുന്നത്. സമൂഹമാധ്യമങ്ങളില്‍ ഇത് ഉയര്‍ത്തിക്കാണിക്കുന്നതിലൂടെ രാഷ്ട്രീയ നേട്ടമാണ് സി.പി.എമ്മിന്റെ ലക്ഷ്യം. വരുംദിവസങ്ങളില്‍ പുതുപ്പള്ളി കടുത്ത രാഷ്ട്രീയ ചൂടിലേക്കാണെന്നതിന്റെ സൂചനകളായാണ് ഇതെല്ലാം വിലയിരുത്തപ്പെടുന്നത്.
കഴിഞ്ഞ രണ്ടുതവണ ഉമ്മന്‍ ചാണ്ടിക്കെതിരെ ശക്തമായ മത്സരം കാഴ്ചവെച്ച ഡി.വൈ.എഫ്.ഐ നേതാവ് ജെയ്ക് സി. തോമസ് തന്നെയാണ് സി.പി.എമ്മില്‍ മുന്‍തൂക്കമുള്ള സ്ഥാനാര്‍ഥിപ്പേര്.പ്രതിപക്ഷ നേതാവ് വി.ഡി. സതീശന്‍ പാമ്ബാടിയില്‍ ഉമ്മന്‍ ചാണ്ടി അനുസ്മരണം ഉദ്ഘാടനം ചെയ്തതും ക്രൈസ്തവ സഭ അധ്യക്ഷനെ സന്ദര്‍ശിച്ചതുമെല്ലാം വോട്ടുറപ്പിക്കുന്നതിന്റെ ഭാഗമാണെന്നാണ് വ്യാഖ്യാനം. ഉപതെരഞ്ഞെടുപ്പിന്റെ സംഘടനാപരമായ ഒരുക്കങ്ങളിലേക്കും കോണ്‍ഗ്രസ് കടന്നു.
ജില്ലയിലെ മുതിര്‍ന്ന നേതാക്കളായ തിരുവഞ്ചൂര്‍ രാധാകൃഷ്ണനും കെ.സി. ജോസഫിനുമാണ് തെരഞ്ഞെടുപ്പ് ചുമതല. ഉമ്മന്‍ ചാണ്ടിയുടെ മരണാനന്തര ചടങ്ങുകള്‍ പൂര്‍ത്തിയാകുന്ന നാല്‍പതാം നാളിനുശേഷം പരസ്യപ്രചാരണ പ്രവര്‍ത്തനങ്ങള്‍ തുടങ്ങാനും പാര്‍ട്ടിയില്‍ ധാരണയായിട്ടുണ്ട്.അതേസമയം, മണ്ഡലത്തിലെ എട്ട് പഞ്ചായത്തുകളില്‍ ആറെണ്ണവും എല്‍.ഡി.എഫാണ് ഭരിക്കുന്നത്. ആ പഞ്ചായത്തുകള്‍ കേന്ദ്രീകരിച്ച് പ്രവര്‍ത്തനം ശക്തമാക്കാനാണ് കോണ്‍ഗ്രസ് നീക്കം.
എന്തായാലും കേരള രാഷ്ട്രീയത്തിലെ അതികായനായിരുന്ന കെ കരുണാകരന്റെ രാഷ്ട്രീയ ജീവിതത്തിന്റെ കൊടിയിറക്കത്തിനു കരുനീക്കിയ ആന്റണിയുടേയും ഉമ്മന്‍ചാണ്ടിയുടേയും മക്കളെ പരസ്പരം പോരടിപ്പിക്കുക എന്നതിലെ രാഷ്ട്രീയത്തിന് ഒട്ടേറെ മാനങ്ങളുണ്ട്.
