ദുബായ് : എയര്‍ ഇന്ത്യ എക്സ്പ്രസ് ദുബായിലേക്ക് യാത്ര ചെയ്യുന്നവര്‍ക്കായി പ്രത്യേക നിര്‍ദ്ദശങ്ങള്‍ പുറത്തിറക്കി. യാത്രയുടെ ഭാഗമായി ഹാജരാക്കുന്ന കോവിഡ് പി.സി.ആര്‍ പരിശോധനാ റിപ്പോര്‍ട്ടില്‍ ക്യൂ.ആര്‍ കോഡ് ഉണ്ടായിരിക്കണമെന്നാണ് സാമൂഹിക മാധ്യമങ്ങളിലൂടെ എയര്‍ ഇന്ത്യ എക്സ്പ്രസ് അറിയിച്ചിരിക്കുന്നത്. പരിശോധനാ റിപ്പോര്‍ട്ടിലെ ക്യൂ.ആര്‍ കോഡ് ഉപയോഗിച്ച് അധികൃതര്‍ക്ക് യഥാര്‍ത്ഥ റിപ്പോര്‍ട്ട് പരിശോധിക്കാന്‍ സാധിക്കണം എന്നതാണ് നിബന്ധന.
ദുബായ് ഹെല്‍ത്ത് അതോറിറ്റിയുടെ അറിയിപ്പ് അനുസരിച്ചാണ് ഇത്തരമൊരു നിര്‍ദ്ദേശം നല്‍കുന്നതെന്നും എയര്‍ ഇന്ത്യ എക്സ്പ്രസ് വിശദീകരിച്ചു. ഇതിനു പുറമേ പരിശോധനയ്ക്കായി സാമ്പിള്‍ ശേഖരിച്ച തീയതി, സമയം, പരിശോധനാ ഫലം റിപ്പോര്‍ട്ട് ചെയ്യുന്ന തീയതി, സമയം എന്നിവയും റിപ്പോര്‍ട്ടില്‍ വ്യക്തമായി രേഖപ്പെടുത്തിയിരിക്കണം.
