തിരുവനന്തപുരം : നിയമസഭാ തിരഞ്ഞെടുപ്പില്‍ പാലാ ഉള്‍പ്പെടെയുള്ള മണ്ഡലങ്ങളിലെ തോല്‍വി അന്വേഷിക്കാന്‍ കേരള കോണ്‍ഗ്രസ് അന്വേഷണ കമ്മീഷനെ നിയോഗിക്കുന്നു. സിപിഐഎം മുന്നോട്ടുവെച്ച മാതൃക പിന്തുടര്‍ന്നുകൊണ്ടാണ് തോല്‍വി പഠിക്കാന്‍ കമ്മീഷന്‍ എത്തുന്നത്. കടുത്തുരുത്തി, പെരുമ്പാവൂര്‍, ചാലക്കുടി എന്നീ മണ്ഡലങ്ങളിലെ തോല്‍വിയും പരിശോധിക്കും. രണ്ടാഴ്ചക്കുള്ളില്‍ അന്വേഷണ കമ്മീഷനെ നിയോഗിക്കുമെന്ന് കേരള കോണ്‍ഗ്രസ് നേതാക്കള്‍ അറിയിച്ചു.
എല്‍ഡിഎഫിന്റെ ഘടകകക്ഷികളില്‍ നിന്നും കേരള കോണ്‍ഗ്രസിന് മതിയായ പിന്തുണ ലഭിച്ചിട്ടില്ലെന്നാണ് പൊതുവായ വിലയിരുത്തല്‍. പാലായില്‍ ജോസ് കെ മാണിയ്ക്ക് സിപിഐഎമ്മിന്റെ ഭാഗത്തുനിന്നുതന്നെ പിന്തുണ ലഭിച്ചില്ലെന്നും നേതാക്കള്‍ക്ക് പരാതിയുണ്ട്. കെഎം മാണിക്കെതിരായ പരാമര്‍ശം സംസ്ഥാനസര്‍ക്കാര്‍ കോടതിക്ക് മുന്നില്‍ നടത്തിയെന്ന വാര്‍ത്ത വിവാദമായ പശ്ചാത്തലത്തില്‍ കേരള കോണ്‍ഗ്രസ് എമ്മിനകത്ത് പ്രതിസന്ധി രൂപപ്പെട്ടിട്ടുണ്ട് എന്നാണ് റിപ്പോര്‍ട്ടുകള്‍. ഈ സാഹചര്യം കൂടി കണക്കിലെടുത്ത് പാര്‍ട്ടിയുടെ സംഘടനാ സംവിധാനത്തില്‍ സമൂലമാറ്റം വരുത്താനുള്ള പ്രവര്‍ത്തനങ്ങള്‍ ഊര്‍ജിതമാക്കാനാണ് ജോസ് കെ മാണിയുടെ പദ്ധതി.
