ന്യൂഡല്ഹി: ക്വാറന്റീന് വിവാദത്തില് പുതിയ വിശദീകരണവുമായി യുകെ. കോവിഷീല്ഡ് വാക്സിന് അംഗീകരിക്കുന്നു എന്നാല് ഇന്ത്യയുടെ വാക്സിന് സര്ട്ടിഫിക്കറ്റില് സംശയം നിലനില്ക്കുന്നുവെന്നുണ്ടെന്നാണ് ബ്രിട്ടന്റെ വിശദീകരണം.
വാക്സിന് എടുത്തവര്ക്ക് ഇംഗ്ലണ്ടില് ക്വാറന്റൈന് നിര്ബന്ധമാക്കിയത് അംഗീകരിക്കാനാകില്ലെന്നും ഇന്ത്യയുടേത് ഉന്നത നിലവാരം പുലര്ത്തുന്ന വാക്സിനുകളാണെന്നും കേന്ദ്രസര്ക്കാര് അവകാശവാദമുന്നയിച്ചു. വിഷയത്തില് ഇന്ത്യന് വിദേശകാര്യ മന്ത്രി എസ് ജയശങ്കര് ബ്രിട്ടനെ അതൃപ്തി അറിയിച്ചെന്ന് വിദേശകാര്യ സെക്രട്ടറി വ്യക്തമാക്കിയിരുന്നു.
കൊവിഷീല്ഡ് വാക്സിന് ഇംഗ്ലണ്ട് അംഗീകരിക്കാത്തത് വിവേചനമാണെന്ന് ഇന്ത്യ നേരത്തെ തുറന്നടിച്ചിരുന്നു. ഇന്ത്യയില് നിന്നും കൊവിഷീല്ഡ് വാക്സിന് സ്വീകരിച്ചാലും ക്വാറന്റീന് വേണമെന്ന് നിര്ബന്ധിത നിര്ദ്ദേശത്തോടായിരുന്നു ഇന്ത്യയുടെ എതിര്പ്പ്. ബ്രിട്ടന്റെ പുതിയ തീരുമാനം ഇന്ത്യയില് നിന്നുള്ള യാത്രക്കാര്ക്ക് തിരിച്ചടിയാണെന്നും വിദേശകാര്യ സെക്രട്ടറി ഹര്ഷവര്ധന് ശിഖ്ള പ്രതികരിച്ചു.നേരത്തെ ശശി തരൂര് എംപിയും ബ്രിട്ടനെ വിമര്ശിച്ച് രംഗത്ത് എത്തിയിരുന്നു.
ഇന്ത്യ നല്കുന്ന കോവിഡ് സര്ട്ടിഫിക്കറ്റില് വ്യക്തത വരുത്താതെ നിര്ബന്ധിത ക്വാറന്റീന് പിന്വലിക്കാന് സാധിക്കില്ലെന്നാണ് യുകെ വ്യക്തമാക്കിയത്.യുകെ മാനദണ്ഡപ്രകാരം കോവിഡ് സര്ട്ടിഫിക്കറ്റില് ജനന തീയതിയാണ് രേഖപ്പെടുത്തേണ്ടത്. എന്നാല് ഇന്ത്യ സര്ട്ടിഫിക്കറ്റില് നല്കുന്നത് വയസ് മാത്രമാണ്. അതിനാല് ഇന്ത്യ സര്ട്ടിഫിക്കറ്റ് തിരുത്തിയാല് മാത്രമേ നിര്ബന്ധിത ക്വാറന്റീന് ഒഴിവാക്കുകയുള്ളൂ എന്ന് ബ്രിട്ടന് വ്യക്തമാക്കി.
തീരുമാനം പിന്വലിച്ചില്ലെങ്കില് കടുത്ത നടപടികളിലേക്ക് കടക്കുമെന്ന് ഇന്ത്യ യുകെയെ അറിയിച്ചിരുന്നു. ഇതിന് പിന്നാലെയാണ് യുകെ നിലപാട് മാറ്റിയത്.
