വഡോദര: രാജ്യത്ത് ആദ്യമായി വരനെ കൂടാതെ സ്വയം വിവാഹം ചെയ്യാനൊരുങ്ങി ഇരുപത്തിനാലുകാരി. ഗുജറാത്ത് സ്വദേശിനിയായ ക്ഷമ ബിന്ദുവാണ് ഈ യുവതി. ഈ മാസം പതിനൊന്നിനാണ് ചടങ്ങ്. ഇത് ഒരുപക്ഷെ ഗുജറാത്തിലെ അല്ലെങ്കിൽ രാജ്യത്തെ തന്നെ ആദ്യ സോളോഗാമിയായിരിക്കുമെന്നാണ് ക്ഷമ ബിന്ദുവിന്റെ അവകാശ വാദം.
‘ഇത് അവിശ്വസനീയമായി തോന്നിയേക്കാം, പരമ്പരാഗതമായ എല്ലാ ചടങ്ങുകളോടും കൂടിയായിരിക്കും വിവാഹം. എന്നാൽ വരൻ ഉണ്ടാകില്ല. എനിക്ക് വിവാഹം കഴിക്കാൻ ആഗ്രഹമുണ്ടായിരുന്നില്ല. എന്നാൽ വധുവാകണമെന്നുണ്ടായിരുന്നു. അതിനാലാണ് സ്വയം വിവാഹിതയാകാമെന്ന് കരുതിയത്. ഒരുപക്ഷേ നമ്മുടെ രാജ്യത്ത് ആത്മസ്‌നേഹത്തിന്റെ ആദ്യ മാതൃക ഞാനായിരിക്കാം. ആളുകൾ അവർ ഇഷ്ടപ്പെടുന്ന ഒരാളെ വിവാഹം കഴിക്കുന്നു. ഞാൻ എന്നെത്തന്നെ സ്‌നേഹിക്കുന്നു, അതിനാലാണ് ഈ കല്യാണം. വിവാഹത്തിന് മാതാപിതാക്കളുടെ അനുഗ്രഹമുണ്ട്. ഗോവയിൽ ഹണിമൂൺ ആഘോഷിക്കുമെന്നും യൂവതി വ്യക്തമാക്കി.
