ട്രാഫിക്ക് ബ്ലോക്കുകൾ തിരിച്ചറിയാനുള്ള ആധുനിക സംവിധാനം ഒരുക്കി ഗൂഗിൾ മാപ്പ്. ഇതിലൂടെ ഉപഭോക്താക്കൾക്ക് പ്രദേശത്തെ കൃത്യമായ ട്രാഫിക്ക് കുരുക്കുകൾ തിരിച്ചറിയാനാകും. ആന്‍ഡ്രോയിഡ് ഉപഭോക്താക്കള്‍ക്ക് വരുന്ന ആഴ്ചകളില്‍ ഇത് ലഭ്യമാകും. ഇതോടെ ഉപയോക്താക്കളുടെ നിലവിലെ ലൊക്കേഷനും അതിന്റെ സമീപത്തെ ട്രാഫിക്കും സംബന്ധിച്ച കൃത്യമായ വിവരങ്ങള്‍ ലഭ്യമാകും.
ഗൂഗിള്‍മാപ്സില്‍ കാണിക്കുന്ന നിയര്‍ബൈ ട്രാഫിക് വിജറ്റിൽ ടാപ്പുചെയ്യുന്നതിലൂടെ ഉപയോക്താക്കൾക്ക് പ്രാദേശിക ട്രാഫിക്ക് പരിശോധിച്ചറിയാനാവും. ഇത് കൂടാതെ 2×2 വലുപ്പത്തിൽ ദൃശ്യമാകുന്ന വിജറ്റിന്റെ പ്രിവ്യൂ ഗൂഗിള്‍ വെളിപ്പെടുത്തിയിട്ടുണ്ട്. ആൻഡ്രോയിഡിനുള്ള ട്രാഫിക് വിജറ്റാണ് നിലവില്‍ ഗൂഗിള്‍ മാപ്പ് പ്രഖ്യാപിച്ചിരിക്കുന്നത്. ഗൂഗിള്‍ മാപ്പിന്റെ ആപ്പ് തുറക്കാതെ തന്നെ നിലവിലെ ലൊക്കേഷനെ ചുറ്റിപ്പറ്റിയുള്ള വിവരങ്ങള്‍ കണ്ടെത്താനാകും.
നിയര്‍ബൈ ട്രാഫിക് വിജറ്റുകള്‍ വ്യത്താകൃതിയോട് സാമ്യമുള്ള ചതുരത്തിലായിരിക്കും നല്‍കുന്നതെന്ന് കമ്പനി അറിയിച്ചു. ഈ ബട്ടണിലൂടെ അവർക്ക് വിജറ്റ് സൂം ഇൻ ചെയ്യാനും സൂം ഔട്ട് ചെയ്യാനും കഴിയും. വിജറ്റിന്റെ മധ്യഭാഗത്ത് ഒരു നീല ഡോട്ട് അടയാളപ്പെടുത്തിയിരിക്കും. ഉപയോക്താവിന്റെ നിലവിലെ സ്ഥാനം ഹൈലൈറ്റ് ചെയ്യുന്നതിനായി ഒരു മാപ്പ് ഇതിലാണ് കാണാനാകുക.
