പല വികസിത രാജ്യങ്ങളെ പോലും പ്രതിസന്ധിയിലാക്കികൊണ്ടാണ് കൊവിഡ് മഹാമാരി പടർന്ന് പിടിച്ചത്. ശക്തമായ ആരോഗ്യ സംവിധാനങ്ങളുള്ള രാജ്യങ്ങൾക്ക് പോലും കൊവിഡന് മുന്നിൽ പി‌‌‌ടിച്ച് നിൽക്കാനായില്ല. . എന്നാൽ, ഈ ബ്രിട്ടീഷ് ദ്വീപിൽ ഇതുവരെയായി ഒരൊറ്റ കൊറോണ കേസ് പോലും റിപ്പോർട്ട് ചെയ്തിട്ടില്ല. അറ്റ്ലാന്റിക് സമുദ്രത്തിന്റെ കരയില്‍ നിന്നും 9881 കിലോമീറ്റര്‍ അകലെയുള്ള ട്രിസ്റ്റൻ ഡ കുൻഹ എന്നറിയപ്പെടുന്ന അഗ്നിപര്‍വ്വത ദ്വീപാണ് വളരെ അത്ഭുതകരമായി കൊവിഡിൽ നിന്ന് രക്ഷ നേടിയത്.
അറ്റ്ലാന്റിക്ക് സമുദ്രത്തിൽ ആഫ്രിക്കൻ വൻകരയ്ക്കും തെക്കേ അമേരിക്കയ്ക്കും ഇടയിലായി കാണപ്പെടുന്ന അഗ്നിപർവത ദ്വീപാണ് ട്രിസ്റ്റൻ ഡ കുൻഹ. ആകെ ജനസംഖ്യ വെറും 250 -ൽ താഴെ മാത്രമാണ്. ദക്ഷിണാഫ്രിക്കയിലെ കേപ്പിൽ നിന്നും ഒരാഴ്ച യാത്ര ചെയ്താലാണ് ദ്വീപിലെത്തിച്ചേരാനാവുക. വളരെ വളരെ അപൂർവമായിട്ടാണ് ആരെങ്കിലും ഈ ദ്വീപിൽ എത്തിച്ചേരുന്നത് തന്നെ. ഇത്രയും നീണ്ട യാത്രയായത് കാരണം ഗവേഷകരോ മത്സ്യത്തൊഴിലാളികളോ പോലും ദ്വീപിലേക്ക് അധികം എത്തിയിരുന്നില്ല. മാത്രവുമല്ല, ലോകമാകെയും കൊറോണ പടർന്നുപിടിച്ച സാഹചര്യത്തിൽ ഏതെങ്കിലും കപ്പലിലെത്തിയ ആർക്കെങ്കിലും കൊവിഡ് ഉണ്ട് എന്ന് സംശയം തോന്നിയാൽ പോലും ആ കപ്പൽ ദ്വീപിലടുപ്പിക്കാൻ സമ്മതിച്ചിട്ടുണ്ടായിരുന്നില്ല.
ദ്വീപിൽ ആരോഗ്യസംവിധാനങ്ങൾ വളരെ പരിമിതമാണ് എന്നത് കൊവിഡിനെ നിയന്ത്രിക്കേണ്ടതിന്റെ ആവശ്യകതയെ സൂചിപ്പിക്കുന്നു. മാത്രവുമല്ല, ഇവിടെ ഏറെപ്പേരും പ്രായമായവരാണ്. എന്തെങ്കിലും അത്യാഹിതം സംഭവിച്ചാൽ തന്നെയും ഐസിയു സൗകര്യമോ വെന്റിലേറ്ററോ ഇവിടെ ലഭ്യമല്ല. അഞ്ച് കുടുംബങ്ങളിലായി 218 പേരും അതിന് പുറമേ ഡോക്ടർമാരും നഴ്സുമടക്കം ആരോഗ്യപ്രവർത്തകരുമാണ് ഇവിടെ ഉള്ളത്.
