നിശബ്ദ കൊലയാളി എന്നറിയപ്പെടുന്ന വാതകമായ കാർബൺ മോണോക്സൈഡിനെ കുറിച്ച് പൊതുജനങ്ങൾക്ക് ജാഗ്രതാ മുന്നറിയിപ്പുമായി ദുബായി പൊലീസ്. നിറമില്ലാത്തതും മണമില്ലാത്തതുമായ കാർബൺ മോണോക്സൈഡ് അബദ്ധവശാൽ പോലും ശ്വസിക്കരുതെന്നും ശ്വസിച്ചാൽ മരണകാരണമാകുമെന്നും ദുബായി പൊലീസ് പുറത്തിറക്കിയ വിഡിയോയിൽ മുന്നറിയിപ്പ് നൽകി.
കാറുകൾ, ട്രക്കുകൾ, ചെറിയ എഞ്ചിനുകൾ, സ്റ്റൗ, വിളക്കുകൾ, ഗ്രില്ല്, ഫയർപ്ലേസ്, ഗ്യാസ് റേഞ്ച്, ചൂള തുടങ്ങിയവയിൽ നിന്ന് പുറത്തേക്ക് വരുന്ന പുകയിൽ കാർബൺ മോണോക്സൈഡ് അടങ്ങിയിട്ടുണ്ടാകും. ഇത് വീടിനുള്ളിലോ വാഹനങ്ങൾക്കകത്തോ കെട്ടിനിൽക്കുകയും തിരിച്ചറിയാൻ കഴിയാത്ത ഇവ ശ്വസിക്കുന്നതിലൂടെ മരണം സംഭവിക്കുകയും ചെയ്യുന്നു. മുറിക്കുള്ളിലോ വാഹനങ്ങൾ പോലുള്ള അടച്ച സ്ഥലങ്ങളിലോ ഇരിക്കുമ്പോൾ ജാഗ്രത പാലിക്കണമെന്നാണ് നിർദേശം
