കാമുകിയുമായി പിരിഞ്ഞ വിഷമത്തിൽ സ്വന്തം മെഴ്സിഡസ് ബെൻസ് കാറിന് തീയിട്ട് ഡോക്ടർ. തമിഴ്നാട്ടിലെ കാഞ്ചീപുരം ജില്ലയിലെ 29കാരനായ ഡോക്ടറാണ് ബെൻസിന് തീവച്ചത്.
കാഞ്ചീപുരത്തെ സ്വകാര്യ മെഡിക്കൽ കോളജിൽ തന്റെ സഹപാഠിയായിരുന്ന കാമുകിയുമായി ഡോക്ടർ ബന്ധം വേർപിരിഞ്ഞിരുന്നു. കുറച്ചുവർഷങ്ങൾക്ക് മുൻപായിരുന്നു ഇരുവരും പിരിഞ്ഞതെങ്കിലും അതിന് ശേഷം യുവാവ് വിഷാദത്തിലായിരുന്നുവെന്നും ചികിത്സ തേടിയിരുന്നെന്നും പൊലീസ് പറഞ്ഞു.
ബെൻസിന് തീവച്ച ശേഷം വാഹനത്തിനുള്ളിൽ തന്നെ ഇരുന്ന ഡോക്ടർ ആത്മഹത്യക്ക് ശ്രമിച്ചതായും പൊലീസ് സംശയിക്കുന്നു. കത്തുന്ന കാർ കണ്ട നാട്ടുകാർ ഫയർഫോഴ്സിനെ വിവരമറിയിക്കുകയും ഡോക്ടറെ പുറത്തെത്തിക്കുകയുമായിരുന്നു. കാർ പൂർണമായും കത്തിനശിച്ചു. തമിഴ്നാട്ടിലെ ധർമപുരി ജില്ലക്കാരനാണ് ഡോക്ടറായ യുവാവ്.
