പ്രസവത്തിനിടെ അമ്മയും കുഞ്ഞും മരിച്ച സംഭവത്തിൽ ഭർത്താവ് റിമാൻഡിൽ. നരഹത്യ കുറ്റം ചുമത്തി ഇന്നലെ വൈകിട്ടോടെയാണ് പോലീസ് അറസ്റ്റ് രേഖപ്പെടുത്തിയത്. ഇയാളുടെ ആദ്യ ഭാര്യയും മകളും ചേർന്നാണ് പ്രസവം എടുത്തത്. കൂടാതെ അക്യുപങ്ചർ ചികിത്സ നൽകിയതും അന്വേഷണ പരിധിയിലുണ്ട്. ചൊവ്വാഴ്ച വൈകിട്ടാണ് കാരയ്ക്കമണ്ഡപം വീട്ടിൽ വെച്ച് ഷമീറയും കുഞ്ഞും മരിച്ചത്
തിരുവനന്തപുരം ജില്ലയിൽ അശാസ്ത്രീയമായ രീതിയിൽ വീടുകളിൽ പ്രസവം നടത്തുന്നുണ്ടെന്ന് വിവരം ആരോഗ്യവകുപ്പിന് നേരത്തെ തന്നെ കിട്ടിയിരുന്നു. ആശുപത്രികളിൽ പോകാൻ ചിലർ ആദ്യം മടിച്ചാലും ആരോഗ്യപ്രവർത്തകർ നിർബന്ധിക്കുന്നതോടെ ഒട്ടുമിക്കവരും ചികിത്സയ്ക്ക് തയ്യാറാകും. ഇത്തരത്തിൽ അശാസ്ത്രീയ രീതിയിൽ പ്രസവം എടുക്കുന്ന സ്ഥാപനങ്ങളെ കുറിച്ചുള്ള വിവരം ഉൾപ്പെടുത്തി ഡിസംബറിൽ എസ് പിക്ക് കത്ത് നൽകിയെന്നാണ് ജില്ല ആരോഗ്യവകുപ്പ് നൽകുന്ന വിവരം.
