ബറേലി: പിഴ ഈടാക്കിയതിന്റെ പ്രതികാരമായി പൊലീസ് സ്റ്റേഷന്റെ ഫ്യൂസൂരി ലൈൻമാൻ. ഉത്തർപ്രദേശിലെ ബറേലിയിലാണ് സംഭവം. കഴിഞ്ഞ ദിവസം രേഖകൾ കൈവശമില്ലാത്തതിനാൽ ബൈക്ക് യാത്രക്കാരനായ ഭഗവാൻ സ്വരൂപ് എന്നയാളിൽ നിന്ന് പിഴ ഈടാക്കിയതിന് പ്രതികാരമായിട്ടാണ് പൊലീസ് സ്റ്റേഷനിലെ തന്നെ ഫ്യൂസൂരിയത്. പിഴയടക്കേണ്ടിവന്ന ഭഗവാൻ സ്വരൂപ് ലൈൻമാനായി ജോലി ചെയ്യുകയായിരുന്നു.
ചെക്ക്‌പോസ്റ്റിൽ വെച്ച് പൊലീസ് ഭഗവാൻ സ്വരൂപിന്‍റെ ബൈക്കിന് കൈകാണിക്കുകയും രജിസ്‌ട്രേഷൻ പേപ്പറുകൾ ഹാജരാക്കാൻ ആവശ്യപ്പെടുകയും ചെയ്തിരുന്നു. എന്നാൽ ആ സമയത്ത് രേഖകൾ വണ്ടിക്കുള്ളിലില്ലായിരുന്നു. താമസ സ്ഥലത്ത് ചെന്ന് രേഖകൾ എടുത്തുകൊണ്ടുവരാമെന്ന് പറഞ്ഞിട്ടും മോദി സിംഗ് എന്ന് പേരുള്ള പൊലീസ് ഉദ്യോഗസ്ഥൻ കേട്ടില്ല. 500 രൂപയാണ് ഇയാളെ കൊണ്ട് പിഴ അടപ്പിച്ചത്.
ഇതിൽ നിരാശനായ ഇയാൾ വൈദ്യുതി വകുപ്പിലെ തന്റെ സഹപ്രവർത്തകരുമായി ചേർന്ന് പൊലീസ് സ്റ്റേഷനിലെ കണക്ഷൻ വിച്ഛേദിക്കാൻ തീരുമാനിച്ചത്. പൊലീസ് സ്റ്റേഷനിലെ വൈദ്യുതി വിതരണത്തിന് മീറ്റർ ഇല്ലെന്നും അതിനാൽ നിയമവിരുദ്ധമായാണ് പ്രവർത്തിക്കുന്നതെന്നും അദ്ദേഹം പിന്നീട് മാധ്യമപ്രവർത്തകരോട് പറഞ്ഞു. സംഭവം ഐഎഎൻഎസ് ആണ് റിപ്പോർട്ട് ചെയ്തത്.
