തിരക്കുപിടിച്ച ഇപ്പോഴത്തെ ജീവിതത്തിൽ പലരും ഭക്ഷണത്തിന് വലിയ പ്രധാന്യം കൊടുക്കാറില്ല. ഇത് ഗുരുതര പ്രത്യാഘാതങ്ങളിലേക്ക് നമ്മെ നയിക്കുന്നത്. എന്നാൽ അബദ്ധം ഒഴിവാക്കിയാൽ നമുക്ക് നിരവധി ഗുണങ്ങൾ നേടാനാകും. പ്രത്യേകിച്ച് പ്രഭാത ഭക്ഷണത്തിന്റെ കാര്യത്തിൽ. പ്രഭാതഭക്ഷണവുമായി ബന്ധപ്പെട്ട് സാധാരണ വരുത്താറുള്ള ചില അബദ്ധങ്ങൾ വിശദീകരിക്കുകയാണ് ഇന്ത്യടിവിക്ക് നൽകിയ അഭിമുഖത്തിൽ പ്രമുഖ ന്യൂട്രീഷ്യനിസ്റ്റ് സാഹിബ ഭരദ്വാജ്.
- പ്രഭാതഭക്ഷണം ഒഴിവാക്കുക
രാത്രിയിൽ താമസിച്ച് കഴിക്കുന്നതു കൊണ്ടോ രാവിലെ വൈകി എഴുന്നേൽക്കുന്നതു മൂലമോ ഭാരം കുറയ്ക്കാനോ ഒക്കെ വേണ്ടി പ്രഭാതഭക്ഷണംതന്നെ വേണ്ടെന്ന് വയ്ക്കുന്ന പലരുമുണ്ട്. ഇത് കൊളസ്ട്രോൾ, ഹൃദ്രോഗം, ടൈപ്പ് 2 പ്രമേഹം എന്നിവയ്ക്കുള്ള സാധ്യത വർധിപ്പിക്കും . സന്തുലിതമായ പ്രഭാതഭക്ഷണം ഇത്തരം അപകട സാധ്യതകൾ കുറച്ച് ഒരു ദിവസത്തിന് മുഴുവൻ ആവശ്യമായ ഊർജ്ജം ശരീരത്തിന് പ്രദാനം ചെയ്യുന്നു.
- ലഘുവായ പ്രഭാതഭക്ഷണം
ഇനിയും ചിലരുണ്ട്. പേരിന് എന്തെങ്കിലും പ്രഭാതഭക്ഷണമായി കഴിക്കും. ഒരു പഴമോ ഒരു ബ്രഡിൻറെ രണ്ട് കടിയോ ഒക്കെ കഴിച്ച് രാവിലെ ജോലിക്കോ പഠനത്തിനോ ആയി ഓടുന്നവർ. ഇത്തരത്തിൽ പാതി വിശപ്പടക്കി പോകുന്നത് എന്തിലെങ്കിലും ശ്രദ്ധ പുലർത്താനുള്ള കഴിവിനെ ബാധിക്കും. ആവശ്യത്തിന് കാലറിയുള്ള ഭക്ഷണം രാവിലെ കഴിക്കാതിരിക്കുന്നത് അന്നത്തെ ദിവസം മുഴുവൻ കാലറി കൂടുതലുള്ള അനാരോഗ്യകരമായ ഭക്ഷണം ആവശ്യമില്ലാതെ കഴിക്കാനുള്ള പ്രവണതയുണ്ടാക്കും. ഇത് ഭാരം വർധിപ്പിക്കും. രാവിലെ കൃത്യമായ ഭക്ഷണം കഴിക്കാത്തവരാണ് ഇടനേരങ്ങളിൽ ഫാസ്റ്റ് ഫുഡൊക്കെ വാരിവലിച്ച് തിന്നുകയെന്ന് പല ഗവേഷണങ്ങളും ചൂണ്ടിക്കാണിക്കുന്നു.
- പെട്ടെന്നുള്ള പ്രഭാതഭക്ഷണം
ഒന്നിരിക്കാൻ പോലും നേരമില്ലാതെ ചപ്പാത്തിയോ ദോശയോ ഒക്കെ ചുരുട്ടി കൈയിലെടുത്ത് അതും കടിച്ചു കൊണ്ട് വണ്ടിയിലേക്ക് കയറുന്നവരുണ്ട്. വേഗത്തിലുള്ള പ്രഭാതഭക്ഷണ ശീലങ്ങളും നല്ലതല്ല. ഇരുന്ന് സമാധാനത്തോടെ ശാന്തമായിട്ട് വേണം കഴിക്കാൻ. ഇത്തരത്തിൽ കഴിക്കുന്നത് ദഹനം മെച്ചപ്പെടുത്തുകയും പോഷണങ്ങൾ ശരിയായി ശരീരം വലിച്ചെടുക്കുന്നതിന് സഹായകമാവുകയും ചെയ്യും.
- പ്രോട്ടീൻ കുറഞ്ഞ ഭക്ഷണം
പ്രഭാതഭക്ഷണത്തിൽ ആവശ്യത്തിന് പ്രോട്ടീൻ ഉൾപ്പെടുത്താതിരിക്കുന്നത് നല്ലതല്ല. പ്രോട്ടീൻ വിഘടിക്കാൻ ഏറെ സമയമെടുക്കുമെന്നതിനാൽ ആവശ്യത്തിന് പ്രോട്ടീൻ അടങ്ങിയ പ്രഭാതഭക്ഷണം കഴിക്കുന്നത് വയർ നിറഞ്ഞ പ്രതീതി വളരെ നേരത്തേക്ക് ഉണ്ടാക്കും. മുട്ട, നട് ബട്ടർ, യോഗർട്ട്, പനീർ എന്നിവയെല്ലാം പ്രോട്ടീൻ സമ്പുഷ്ടമായ ഭക്ഷണങ്ങളാണ്. സോസേജ്, ബേക്കൺ തുടങ്ങിയ സംസ്കരിച്ച ഭക്ഷണങ്ങൾ ഒഴിവാക്കാനും ശ്രമിക്കണം.
- കാർബോഹൈഡ്രേറ്റ് തീരെയില്ലാത്ത ഭക്ഷണം
ഡയറ്റിങ്ങിൻറെ പേരിൽ കാർബോഹൈഡ്രേറ്റ് തീരെയില്ലാത്ത വിഭവങ്ങൾ പ്രഭാതഭക്ഷണമായി തിരഞ്ഞെടുക്കുന്നവരുണ്ട്. ഇതും ആരോഗ്യപ്രദമല്ല. പതിയെ ഊർജ്ജം പുറത്ത് വിടുന്നതും രക്തത്തിലെ ഗ്ലൂക്കോസ് തോത് പെട്ടെന്ന് വർധിപ്പിക്കാത്തതുമായ കോംപ്ലക്സ് കാർബുകൾ പ്രഭാതഭക്ഷണത്തിനായി തിരഞ്ഞെടുക്കാം. ഓട്സ്, ഉപ്പ്മാവ്, പൊഹ, സാൻഡ് വിച്ച് എന്നിവയെല്ലാം മികച്ച ഓപ്ഷനുകളാണ്. നേരെ മറിച്ച് സിംപിൾ കാർബ് അടങ്ങിയ പഴച്ചാറുകൾ, വേഫലുകൾ പാൻകേക്കുകൾ എന്നിവ പ്രഭാതഭക്ഷണത്തിന് തിരഞ്ഞെടുക്കുന്നത് ഏതാനും മണിക്കൂറുകൾ കഴിയുമ്പോൾതന്നെ ഭയങ്കരമായി വിശക്കാനും ഊർജ്ജം താഴാനും കാരണമാകും.
