തിരുവനന്തപുരം: കോണ്‍ഗ്രസില്‍ അടിമുടി മാറ്റത്തിനൊരുങ്ങി കെപിസിസി പ്രസിഡന്റ് കെ.സുധാകരന്‍. അച്ചടക്കം ലംഘിച്ചാലും ഗ്രൂപ്പ് യോഗം ചേര്‍ന്നാലും വലിപ്പച്ചെറുപ്പം നോക്കാതെ നപടിയുണ്ടാകുമെന്ന് അദ്ദേഹം പറഞ്ഞു. മറ്റേത് പാര്‍ട്ടിയേക്കാളും വിമര്‍ശിക്കാനുള്ള സ്വാതന്ത്ര്യം കോണ്‍ഗ്രസിലുണ്ട്. പക്ഷേ പാര്‍ട്ടി ഫോറത്തിനകത്താകണം. ഫെയ്സ്ബുക്കിലും മാധ്യമങ്ങളിലും അഭിപ്രായം പറഞ്ഞ് പാര്‍ട്ടിയേയും നേതാക്കളേയും അവഹേളിച്ചാല്‍ മുഖം നോക്കാതെ നടപടിയെടുക്കാനാണ് തീരുമാനം.
ഡിസിസി പ്രസിഡന്റുമാരുടെ ശില്‍പ്പശാലക്ക് ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. വാക്കില്‍ മാത്രമല്ല പ്രവൃത്തിയിലൂടെയാണ് മാറ്റം.കോണ്‍ഗ്രസിനെ ആറു മാസം കൊണ്ട് അടിമുടി മാറ്റുമെന്ന വാഗ്ദ്ധാനം നടപ്പില്‍ വരുത്തുന്നതിലേക്കുള്ള ചുവടുവെപ്പിലാണിപ്പോള്‍ സുധാകരനും പാര്‍ട്ടിയും. സംസ്ഥാന കോണ്‍ഗ്രസില്‍ അടിമുടി മാറ്റത്തിനായി നേതാക്കള്‍ക്കും അണികള്‍ക്കും മാര്‍ഗ്ഗരേഖ ഇറക്കിയിരിക്കുകയാണ്. നേതൃത്വം. തര്‍ക്കങ്ങളും പരാതികളും തീര്‍ക്കാന്‍ ജില്ലാതലങ്ങളില്‍ സമിതി ഉണ്ടാക്കും. പാര്‍ട്ടിയിലെ മുഴുവന്‍സമയ പ്രവര്‍ത്തകര്‍ക്ക് പ്രതിമാസം ഇന്‍സെന്റീവ് അനുവദിക്കും. കോണ്‍ഗ്രസ് ഭാരാവാഹികള്‍ക്ക് യൂണിറ്റ് തലം മുതല്‍ സംസ്ഥാന തലം വരെ ചുമതലകള്‍ കൃത്യമായി വീതിച്ചു നല്‍കും. ചുതമല നിര്‍വഹണം കൃത്യമായ ഇടവേളകളില്‍ പരിശോധിക്കും. കാര്യക്ഷമമല്ലെങ്കില്‍ തല്‍സ്ഥാനത്ത് നിന്ന് മാറ്റും. നിശ്ചയിച്ച ലക്ഷ്യം പൂര്‍ത്തീകരിക്കാത്തവരെ തുടരാന്‍ അനുവദിക്കേണ്ടതില്ലെന്ന പൊതുവികാരമാണ് ശില്‍പ്പശാലയില്‍ ഉയര്‍ന്നുവന്നതെന്ന് സുധാകരന്‍ പറഞ്ഞു.
പാര്‍ട്ടി പ്രവര്‍ത്തന രംഗത്ത് വനിതകളുടെ പ്രാതിനിധ്യം കുറവാണെന്ന ആക്ഷേപം നിലവിലുണ്ട്. ഡിസിസി അധ്യക്ഷ പുനഃസംഘടന മാത്രമേ നടന്നിട്ടുള്ളൂ. വിശാലമായ പുനഃസംഘടന നടക്കാനുണ്ട്. അതിലെല്ലാം വനിതകള്‍ക്ക് മതിയായ പ്രാതിനിധ്യം നല്‍കും. എല്ലാ നിയോജകണ്ഡലത്തിലും ഒരു മണ്ഡലം പ്രസിഡന്റ് പദവി വനിതക്കായി നീക്കിവെക്കാന്‍ തീരുമാനിച്ചിട്ടുണ്ട്.
അടത്തട്ട് മുതല്‍ മുകള്‍ത്തട്ട് വരെയുള്ള നേതാക്കളോട് എല്ലാവരോടും ആവശ്യപ്പെടാനുള്ളത്, പാര്‍ട്ടി വേണോ ? കോണ്‍ഗ്രസ് നിലനില്‍ക്കണോ ? എങ്കില്‍ അച്ചടക്കത്തോട് പാര്‍ട്ടിയില്‍ നില്‍ക്കണമെന്നാണ് കെപിസിസിക്ക് ആവശ്യപ്പെടാനുള്ളത്. നേതൃത്വം ഉയര്‍ന്നുവരേണ്ടത് ഫ്ളക്സില്‍ നിന്നല്ല. ജനങ്ങളില്‍ നിന്നാണ്. സമരമുഖങ്ങളില്‍ നിന്നാണ്. ജനങ്ങളുടെ പ്രതിസന്ധികളില്‍ നിന്നാണ് നേതൃത്വം ഉയര്‍ന്നുവരേണ്ടത്. ഒരാള്‍ക്ക് ഒരു പദവി എന്നത് എല്ലാ തലങ്ങളിലും നടപ്പാക്കും.
എത്ര തവണ ബാങ്കിന്റെ ഡയറക്ടറാകാം പ്രസിഡന്റാകാം എന്നതിന് മാനദണ്ഡമുണ്ടാകും. കോണ്‍ഗ്രസ് ഭരിക്കുന്ന സഹകരണ പ്രസ്ഥാനങ്ങളില്‍ ക്രമരഹിതമായ പ്രവര്‍ത്തനങ്ങളുണ്ട്. അതുപൂര്‍ണ്ണമായും തുടച്ചുനീക്കം. ഒരു സഹകരണ സെല്‍ എല്ലാ ജില്ലയിലുമുണ്ടാകും. അവരുടെ പരിധിയിലാകും ജില്ലയിലെ സഹകരണ സംഘങ്ങളുടെ പ്രവര്‍ത്തനം നിശ്ചയിക്കുക. പരമാവധി രണ്ടു തവണ മാത്രമേ അവസരം നല്‍കൂ. അനിവാര്യ ഘട്ടത്തില്‍ മൂന്ന് തവണവരെയാകാം. കോണ്‍ഗ്രസിന്റെ ജാഥ, പൊതുയോഗം, പത്രസമ്മേളനം എന്നിവിടങ്ങളില്‍ കൂട്ടംകൂടി നില്‍ക്കുന്ന പ്രവണത ഇനി ഉണ്ടാകില്ല. ആവശ്യമുള്ള ആളുകള്‍ മാത്രമേ ഇത്തരം സന്ദര്‍ഭങ്ങളില്‍ ഉണ്ടാകുകയുള്ളൂവെന്നും സുധാകരന്‍ കൂട്ടിച്ചേര്‍ത്തു.
