അഹമ്മദാബാദ്: ഗുജറാത്തില്‍ പുതിയ മുഖ്യമന്ത്രിയായി ഭൂപേന്ദ്ര പട്ടേല്‍ ചുമതലയേല്‍ക്കും. ഘട്ട്‌ലോഡിയയില്‍ നിന്നുള്ള നിയമസഭാംഗമാണ് ഭൂപേന്ദ്ര പട്ടേല്‍. ഗുജറാത്ത് മുഖ്യമന്ത്രിയായിരുന്ന വിജയ് രൂപാനി ശനിയാഴ്ച രാജി വച്ചിരുന്നു. ഇതിന് പിറകെ ഞായറാഴ്ച ഗാന്ധിനഗറില്‍ ചേര്‍ന്ന ബിജെപി നിയമസഭാകക്ഷി യോഗത്തിലാണ് പുതിയ മുഖ്യമന്ത്രിയെ തിരഞ്ഞെടുത്തത്.
ബിജെപി സംസ്ഥാന ഘടകത്തിന്റെ ഇന്‍ചാര്‍ജാണ് ഭൂപേന്ദ്ര പട്ടേല്‍. ഗുജറാത്ത് മുന്‍മുഖ്യമന്ത്രി ആനന്ദിബന്‍ പട്ടേല്‍ മത്സരിച്ചിരുന്ന ഘട്ട്ലോഡിയയില്‍നിന്നുള്ള എംഎല്‍എയാണ്. നിയമസഭാ സാമാജികനായുള്ള കന്നി ഊഴത്തില്‍ തന്നെ മുഖ്യമന്ത്രിയായും അരങ്ങേറ്റം ലഭിച്ചിരിക്കുകയാണ് അദ്ദേഹത്തിന്..നടപ്പ് നിയമസഭയില്‍ ആദ്യമായി എംഎല്‍എ ആയ പട്ടേല്‍ മേംനഗര്‍ മുനിസിപ്പാലിറ്റി പ്രസിഡന്റ് സ്ഥാനവും അഹമ്മദാബാദ് മുനിസിപ്പല്‍ കോര്‍പ്പറേഷന്‍, അഹമ്മദാബാദ് നഗര വികസന അതോറിറ്റി എന്നിവയുടെ സ്റ്റാന്‍ഡിംഗ് കമ്മിറ്റി ചെയര്‍മാന്‍ സ്ഥാനങ്ങളും വഹിച്ചിട്ടുണ്ട്.
നിയമസഭാ കക്ഷി യോഗത്തില്‍ നരേന്ദ്ര സിങ് തോമാറിനു പുറമെ കേന്ദ്രമന്ത്രിയായ പ്രല്‍ഹാദ് ജോഷിയും പങ്കെടുത്തു. ഭൂപേന്ദ്ര പട്ടേലിന്റെ സത്യപ്രതിജ്ഞ നാളെ നടക്കുമെന്നാണ് വിവരം. കഴിഞ്ഞ ദിവസമാണ് വിജയ് രൂപാണി ഗവര്‍ണര്‍ ആചാര്യ ദേവരതിന് രാജി സമര്‍പ്പിച്ചത്. നിയമസഭാ തെരഞ്ഞെടുപ്പിന് ഏതാനും മാസങ്ങള്‍ ബാക്കിനില്‍ക്കെയായിരുന്നു രാജി. ഉപമുഖ്യമന്ത്രി നിതിന്‍ പട്ടേല്‍, കേന്ദ്ര ആരോഗ്യമന്ത്രി മന്‍സൂഖ് മാണ്ഡവ്യ, ലക്ഷദ്വീപ് അഡ്മിനിസ്ട്രേറ്റര്‍ പ്രഫുല്‍ ഖോട പട്ടേല്‍, ബി.ജെ.പി സംസ്ഥാന അധ്യക്ഷന്‍ സിആര്‍ പാട്ടീല്‍, കൃഷി മന്ത്രി ആര്‍സി ഫല്‍ദു, കേന്ദ്രമന്ത്രി പുരുഷോത്തം രൂപാല എന്നിവരുടെ പേരാണ് പ്രധാനമായും മുഖ്യമന്ത്രി സ്ഥാനത്തേക്ക് ഉയര്‍ന്നുകേട്ടിരുന്നത്. എന്നാല്‍, പട്ടേല്‍ സമുദായത്തിന്റെ അതൃപ്തി ഒഴിവാക്കാന്‍ ഈ വിഭാഗത്തില്‍നിന്നുള്ള നേതാവിനെ മുഖ്യമന്ത്രിയാക്കണമെന്ന ആവശ്യവും സജീവമായിരുന്നു. ഇതു ഭൂപേന്ദ്രയുടെ നിയമനത്തില്‍ സ്വാധീനിച്ചിട്ടുണ്ടാകാമെന്നാണു കരുതപ്പെടുന്നത്.
